ཡིད་སྐྱོ་བའི་གནས་ཚུལ།

ཕྱི་ལོ་༢༠༡༤ཟླ་ ༣ ཚེས་ ༡༩ ཉིན་༧སྨན་རིའི་དགེ་བཤེས་གཉའ་བསྟན་འཛིན་ལྷུན་གྲུབ་ལགས་གློ་བུར་དུ་ཞིང་གཤེགས་ཀྱི་གནས་ཚུལ།

རྩོམ་པ་པོ།  ཁྲི་གཡུང་དྲུང་།

IMG_0871

དགེ་བཤེས་བསྟན་འཛིན་ལྷུན་གྲུབ་ལགས་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་གི་སྐབས་བཅུ་བདུན་པའི་དགེ་བཤེས་བཅུ་གཉིས་ཡོད་པའི་ཨང་རིམ་གསུམ་པ་དེ་རེད། ཕྱི་ལོ་༢༠༡༤ཟླ་ ༣ ཚེས་ ༨ཉིན་ཁོང་གི་དགེ་བཤེས་གཏོང་སྒོ་ཆེན་མོ་དང་སྔོན་འགྲོའི་གཞུང་བཤད་སོགས་གནང་ཡོད་པ་དང་། ༢༠༡༤ཟླ་༣ཚེས་༡༣ཉིན་གྱི་སྔ་དྲོར་ངག་རྒྱུགས་དམ་བཅའ་དང་ཕྱི་དྲོར་རྩོད་རྒྱུགས་དམ་བཅའ་ཆེན་མོར་བཞུགས་གནང་མཛད།

IMG_0870

༢༠༡༤ཟླ་ ༣ ཚེས་ ༡༧ ཉིན་སྔ་དྲོའི་ཕྱག་ཚོད་བཅུ་པ་ཙམ་ལ་༧དཔལ་གཤེན་བསྟན་སྨན་རིའི་གཙུག་ལག་ཁང་དུ་བཀྲ་ཤིས་དམ་བཅར་བཞུགས་ཡོད་པ་དང་། ཉིན་རྒྱབ་ཕྱག་ཚོད་དང་པོ་ཙམ་ལ་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རི་བའི་མདུན་ནས་གཡུང་དྲུང་བོན་གྱི་མདོ་སྔགས་སེམས་གསུམ་གྱི་གཞུང་ཆེན་ཡིག་ཆ་རྣམས་དང་རིག་པའི་གནས་བཅས་ལ་གསན་སྦྱངས་ཚུལ་མཐུན་མཛད་དེ། སྟོན་པ་སངས་རྒྱས་གཤེན་རབ་མི་བོ་བདེ་བར་གཤེགས་ནས་མི་ལོ་ ༩༨༣༡ བོད་ཤིང་རྟ་ལོར་༧དཔལ་གཤེན་བསྟན་སྨན་རིའི་གླིང་དུ་དམ་འཇོག་གནང་བས་སྦྱོང་རྒྱུགས་ཚད་མཐོར་ཐོན་པའི་འབྲས་རྟགས་བཀའ་རབ་འབྱམས་པ་དགེ་བའི་བཤེས་གཉེན་ཆེན་པོའི་ཕྱག་འཁྱེར་བཞེས་གནང་སྟེ་སྐལ་བཟང་ཁྲི་སྟོན་གྱི་མཛད་སྒོ་སྤེལ་ནས་བོན་གཞིས་སེར་སྐྱ་མང་ཚོགས་ཡོངས་ཀྱིས་མཇལ་བཅར་ཞུས་ཏེ་“བསྐལ་པ་བཟང་”ཞེས་རྟེན་འབྲེལ་དང་མནྚལ་རྟེན་དོད་སོགས་ཕུལ་ཏེ་མཛད་སྒོ་རྒྱལ་ཁའི་ངང་ལེགས་གྲུབ་བྱུང་ཡོད་པ་དང་། ཕྱི་ཉིན་ཕྱི་ཚེས་༡༨ ཉིན་ཕྱི་རྒྱལ་ཡུལ་གྲུ་ཁག་ནས་ཕེབས་པའི་སྐུ་མགྲོན་རྣམས་དང་བོན་གཞིས་སློབ་ཕྲུག་སེར་སྐྱ་མང་ཚོགས་ཡོངས་ལ་གསོལ་ཚིགས་རྒྱས་འབུལ་ཞུས་ནས་སྐབས་བཅུ་བདུན་པའི་སྨན་རིའི་དགེ་བཤེས་མཛད་སྒོ་ཡོངས་སུ་ལེགས་གྲུབ་ཞུས།IMG_0872

ཕྱི་ལོ་༢༠༡༤ཟླ་ ༣ ཚེས་ ༡༩ ཉིན་སྔ་དྲོའི་ཕྱག་ཚོད་དགུ་པ་ཙམ་ལ་གློ་བུར་དུ་སྙུང་གཞི་ཞིག་འཕར་ཏེ་ཕྱག་ཚོད་བཅུ་གཅིག་ཙམ་ལ་ས་གནས་སོ་ལན་SOLANསྨན་ཁང་དུ་སྐུ་གཤེགས་པའི་ཡིད་སྐྱོ་བའི་གནས་ཚུལ་བྱུང་།

ཞིང་གཤེགས་དམ་པ་༧སྨན་རིའི་དགེ་བཤེས་གཉའ་བསྟན་འཛིན་ལྷུན་གྲུབ་ལགས་ནི་ ༡༩༧༤ ཟླ་ ༢ ཚེས་ ༣ ཉིན་མདོ་སྨད་མཚོ་སྔོན་བཱ་ཡན་(དཔའ་ལུང་)རྫོང་ཁོངས་སུ་སྐུ་འཁྲུངས་ཤིང་ས་གནས་སློབ་ཆུང་ནས་སློབ་འབྲིང་མཐར་ཕྱིན་པར་མཛད། ཕྱི་ལོ་ ༡༩༩༦ ལོར་རྒྱ་གར་འཕགས་ཡུལ་དུ་འབྱོར་ནས་ཤེས་རབ་དགའ་ཚལ་སློབ་གླིང་སོགས་སུ་དབྱིན་ཡིག་སོགས་ལ་སློབ་སྦྱོང་གནང་ཡོད་པ་དང་། ཕྱི་ལོ་༡༩༩༧ཟླ་ ༡༢་ཚེས་ ༡༢ ཉིན་༧གཡུང་དྲུང་བོན་གྱི་གདན་ས་སྨན་རིའི་གླིང་དུ་འབྱོར་ནས་རབ་བྱུང་གི་སྒྲིག་ཞུགས་ཞུས་ཤིང་། ཕྱི་ལོ་༢༠༠༣ཟླ་ ༣ ཚེས་ ༡༨ ཉིན་༧རྒྱལ་བ་སྨན་རིའི་མཁན་སློབ་རྣམས་ཀྱི་དྲུང་དུ་དག་པ་དྲང་སྲོང་ངམ་དགེ་སློང་གི་སྡོམ་ཁྲིམས་བཞེས་ཡོད་པ་དང་།

ཕྱི་ལོ་ ༡༩༩༨ ཟླ་ ༤ཚེས་ ༣ཉིན་གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་ཁོངས་སུ་ཞུགས་ཏེ་གཡུང་དྲུང་བོན་གྱི་ཐུན་མོང་མ་ཡིན་པའི་གཞུང་ཆེན་བཀའ་པོད་དྲུག་དང་ཐུན་མོང་རིག་གནས་བཅས་ལ་སློབ་གཉེར་ཚུལ་བཞིན་མཛད་དེ་ཕྱི་ལོ་༢༠༡༢ལོར་སྨན་རིའི་སློབ་གཉེར་བ་ཡོངས་ཀྱི་ཁོངས་ནས་ལོ་འཁོར་ཡིག་རྒྱུགས་ཆེན་མོའི་སྐབས་ཨང་དང་པོ་བླངས་ཡོད་པ་དང་ཕྱི་ལོ་༢༠༡༣ལོར་ཡང་སྨན་རིའི་སློབ་གཉེར་བ་ཡོངས་ཀྱི་ཁོངས་ནས་ཡིག་རྒྱུགས་ཨང་དང་པོར་ཐོབ་ཡོད་པ་དང་། ཕྱི་ལོ་ ༢༠༡༤་ཟླ་ ༣ ཚེས་ ༡༧ ཉིན་༧སྐྱབས་རྗེ་རྒྱལ་བ་སྨན་རིའི་མཁན་སློབ་གཉིས་ཀྱི་དྲུང་ནས་བཀའ་རབ་འབྱམས་པ་དགེ་བའི་བཤེས་གཉེན་ཆེན་མོའི་མཚན་རྟགས་བཞེས་ཡོད་པ་བཅས་ཀྱི་གནས་བསྡུས་ཙམ་དུ་གང་གི་གྲོགས་ཀྱི་ཐུ་བོ་ཁྲི་གཡུང་དྲུང་དུ་འབོད་པས་ཕྱི་ལོ་༢༠༡༤ཟླ་ ༣་ཚེས་༢༤ཉིན་བྲེལ་བྲིས་སུ་བགྱིས་པ་དགེ།

ཡིད་སྐྱོ་བའི་གནས་ཚུལ།” སྟེང་དུ་དཔྱད་མཆན 1 ཡོད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།