ཀུན་སྐྱོབ་བྱམས་མའི་སྔགས་བསྟོད་བཞུགས་སོ།།

ཀུན་སྐྱོབ་བྱམས་མའི་སྔགས་བསྟོད་བཞུགས་སོ།།

༄༅། །དགེ་རྒྱས་ཆེན་པོ་བདག་ལ་དགོངས་སུ་གསོལ་ལོ། །བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས། དགེ་བཅུའི་རྒྱལ་བ་རྣམས་ཀྱིས་མཛད་པ་ཅི་བཞིན་དུ། དུས་འདི་ནས་བཟུང་ནས་འབྲས་བུ་སངས་རྒྱས་ཀྱི་བར་དུ། སྐུ་ལྔ་ཡེ་ཤེས་ལྔ་ཡི་མངའ་བདག་སངས་རྒྱས་ལ་སྐྱབས་སུ་མཆིའོ། །ཚད་གསུམ་བདེན་པ་གཉིས་ཀྱི་རང་བཞིན་བོན་ལ་སྐྱབས་སུ་མཆིའོ།།ས་གསུམ་སྤངས་རྟོགས་ལམ་གྱི་སྣ་འདྲེན་སེམས་དཔའ་ལ་སྐྱབས་སུ་མཆིའོ།། དྲང་སྲོང་ཆེན་པོ་བདག་ལ་དགོངས་སུ་གསོལ། བདག་ནི་བསྐལ་བ་འབུམ་ཕྲག་གྲངས་མེད་པའི་དུས་ནས། ད་ལྟ་འདི་ལ་ཐུག་གི་བར་དུ། སྡིག་པ་མི་དགེ་བའི་ལས་ཅི་བགྱིས་པ་ཐམས་ཅད་སྦྱང་བའི་ཐབས་ཅིག་འཚལ་ལོ།།རྩ་ལག་གི་ཉམས་ཆག་ཇར་བྱས་པ་ལ་གནོང་ཞིང་བཤགས་པར་འཚལ་ལོ།། ད་ལྟར་བགྱིས་པ་ལ་མི་འཆབ་ཅིང་འགྱོད་པར་འཚལ་ལོ།། སླད་ཆད་ཀྱང་མི་བགྱིད་དེ་སྡོམ་པར་འཚལ་ལོ། ། སེམས་དཔའ་ཆེན་པོ་བདག་ལ་དགོངས་སུ་གསོལ་ལོ། ། གཡུང་དྲུང་གི་ས་ཆེན་པོ་ལ་རབ་ཏུ་ཞུགས་ནས།སེམས་དཔའ་རྣམས་ཀྱིས་བགྲོད་པ་ཅི་བཞིན་དུ། བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས། རིན་པོ་ཆེའི་སེམས་འདི་ཡོངས་སུ་བཟུང་ནས། ཐེག་པ་གོང་མ་ལ་སྤྱོད་ཅིང༌། ཁྲི་འཕང་དང་པོ་ལ་རྟོགས་ཏེ།གཤེན་རབ་ཀྱི་ལམ་བགྲོད་པར་བྱའོ།།དཀར་པོ་བག་ཆགས་མེད་པ་དང༌།ཐུགས་རྗེའི་རྒྱུན་དུ་ཞུགས་པ་དང༌། དྲང་པོ་འཁོར་བ་མེད་པ་དང༌།དབུ་མ་མཐའ་རུ་ཕྱིན་པ་དང༌། གཤེན་རབ་ཀྱི་ལམ་བགྲོད་ཅིང་ངེས་དོན་བསྒོམ་པར་འཚལ་ལོ།། ཡེ་གཤེན་ཆེན་པོ་བདག་ལ་དགོངས་སུ་གསོལ། བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས། རྫོགས་པའི་སངས་རྒྱས་རྣམས་ཀྱི་མཛད་པ་ཇི་བཞིན་དུ། གཡུང་དྲུང་སེམས་དཔའི་སྤྱོད་པ་ཟབ་མོ་ལ་བསླབ་པར་བགྱིའོ། །འཁོར་བའི་བོན་རྣམས་འཁོར་བ་ལ་གནས་པར་མི་བྱའོ། །འཁོར་བའི་བོན་རྣམས་ལ་འཁོར་བ་ལ་གནས་པར་མི་བྱའོ། །འཁོར་བའི་བོན་རྣམས་ཀྱི་འཁོར་བ་ལ་གནས་པར་མི་བྱའོ། །རྣམ་པར་བྱང་བ་མྱ་ངན་ལས་འདས་པ་ཡང་དག་པའི་དོན་ལ་སྤྱོད་ཅིང་སྤྱད་པར་བགྱིའོ། །མ་མཆོག་དུས་གསུམ་རྒྱལ་བའི་ཡུམ་ཆེན་མོ། བདེ་བར་གཤེགས་པ་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་མ་ཆེན་མོའི་ཡུམ་ལ་ཕྱག་འཚལ་ལོ། །ཨཱོཾ་མ་བ་མ་དེ་མ་ཧི་མོ་ཧ་ཨེ་མ་ཧོ་མ་ཡེ་རུ་པ་ཡེ་ཏ་འདུ་འདུ་སྭཱ་ཧཱ། ཨཱོཾ་ནི་ཀུན་གསལ་བྱམས་མ་ཆེན་མོ། ཐབས་ཆེན་སྨོན་ལམ་ཐུགས་རྗེའི་ཉི་མ། །སྟོབས་ཀྱི་བྱམས་མ་སྐུ་ལྔ་མཆོག་གི །རྒྱས་པ་འབུམ་བདག་ཡུམ་ལ་ཕྱག་འཚལ། །མ་ནི་སྐྱེ་མེད་གདོད་དག་བོན་སྐུ། །དྲན་པས་དགྲ་ཡི་འཇིགས་སྐྱོན་ཟློག་མ། །ཀུན་ཁྱབ་སངས་རྒྱས་སྐྱེད་བྱེད་བདག་ཉིད། །འབུམ་གཟུངས་མདོ་གསུམ་ཡུམ་ལ་ཕྱག་འཚལ། །བ་ནི་འགག་མེད་བོན་སྐུའི་རྩལ་མཆོག །གཙེ་བའི་བྱད་དང་རིགས་སྔགས་གཅོད་མ། །ཀུན་ལྡན་ཡུམ་ཆེན་ཐར་བའི་ལམ་འདྲེན། །སྐུ་གསུམ་དོན་ལྡན་ཡུམ་ལ་ཕྱག་འཚལ། །མ་མཆོག་ཚད་མེད་རྫོགས་སྐུ་ཆེན་མོ།།བུ་འདོད་འགྲོ་ལ་རྒྱལ་རིགས་སྟེར་མ། །ཀུན་བསྐྱེད་སེམས་ཅན་དོན་ལ་བརྩེ་མཛད། །དོན་གསུམ་མངའ་བདག་ཡུམ་ལ་ཕྱག་འཚལ། །དེ་དོན་རྫོགས་སྐུ་རྟོགས་པའི་ཡེ་ཤེས། །མཛེ་དང་སུརྱ་ཀླུ་གདོན་འདུལ་མ། །ཀུན་སྒྲོལ་འཁོར་བའི་སྡུག་བསྔལ་ཞི་བྱེད། །རྣམ་གསུམ་གདོན་འདུལ་ཡུམ་ལ་ཕྱག་འཚལ། །མ་ཅིག་སྤྲུལ་སྐུའི་ལམ་འབྲས་ཉིད་ནི། །མུ་སྟེགས་ཕ་རོལ་རྒོལ་བའི་གཤེད་མ། །ཀུན་མཁྱེན་ཐམས་ཅད་ཡུམ་གྱུར་ཇོ་མོ། །རྟགས་གསུམ་སྟོན་མཛད་ཡུམ་ལ་ཕྱག་འཚལ། །ཧི་ནི་སྤྲུལ་སྐུ་རིག་པའི་ཁམས་ཉིད། །མི་གཙང་སྐྱོན་རྣམས་འཇོམས་པར་མཛད་མ། །ཀུན་སྐྱོབ་གཟི་བརྗིད་ཆེ་བའི་ལྷ་མོ། །དག་པ་གསུམ་ལྡན་ཡུམ་ལ་ཕྱག་འཚལ། །མོ་ནི་གཡོ་མེད་ངོ་བོ་ཉིད་སྐུ། །འཆི་བའི་འཇིགས་ལ་ཚེ་མཆོག་སྦྱིན་མ། །ཀུན་རིག་འཚམས་སྦྱོར་ཐུགས་རྗེའི་ཐབས་མཁས། །མངོན་སུམ་སྣང་མཛད་ཡུམ་ལ་ཕྱག་འཚལ། །ཧ་ནི་ངོ་བོ་ཉིད་སྐུུ་ཆེ་བ། །གཟའ་སྐར་སྡེ་བརྒྱད་མ་ལུས་འདུལ་མ།།ཀུན་འདུལ་མ་བྱོན་སངས་རྒྱས་སྐྱེད་བྱེད། །གནས་གསུམ་དག་པའི་ཡུམ་ལ་ཕྱག་འཚལ། །ཨེ་ནི་ཞི་རྒྱས་དབང་དྲག་རྩ་བ། །ཕྲིན་ལས་རྣམ་བཞི་དགྱེས་མཛད་ཉིད་མ། །ལྷ་སྨན་མཁའ་འགྲོ་མ་མོ་ཚོགས་བཅས། །སྟོབས་བཞི་ལྷུན་གྲུབ་ཡུམ་ལ་ཕྱག་འཚལ།།མ་ཞེས་བླ་མེད་སྲིད་པའི་བྱམས་ཆེན།།ཡེ་ཤེས་བཀྲ་ཤིས་སྣ་ཚོགས་སྟོན་མ། །རྣམ་དག་པདྨ་གཡུང་དྲུང་ཀློང་གི །སྡེ་བཞི་རྒྱས་མཛད་ཡུམ་ལ་ཕྱག་འཚལ། །ཧོ་ལས་ཕྱི་ནང་གསང་བ་ཡང་གསང༌། །མངོན་རྟོགས་ཐབས་དང་གནས་དག་ལམ་འབྱེད། །བཅུ་དྲུག་ལམ་འབྱེད་མངོན་བཞུགས་ཆེན་མོ། །སྒོ་བཞི་སྲུང་མཛད་ཡུམ་ལ་ཕྱག་འཚལ།།མ་ཆེན་བྱམས་ཆེན་བརྒྱ་དང་རྩ་བརྒྱད། །འབུམ་དང་ལུང་དང་རིགས་པའི་གནས་མ། །མདོ་སྡེའི་མངའ་བདག་རྒྱུད་ཀྱི་དབང་འབུམ། །མཛོད་དོན་མཆོག་བཞིའི་ཡུམ་ལ་ཕྱག་འཚལ། །ཡེ་ནི་བྱམས་ཆེན་སུམ་བརྒྱ་དྲུག་ཅུ། །ཁམས་དང་གནས་དང་རིག་པའི་ཡུལ་ལ། །ལྟོས་མཛད་འགྲོ་བའི་དོན་དུ་བཞེངས་མ།།ཡུལ་བཞི་སངས་རྒྱས་ཡུམ་ལ་ཕྱག་འཚལ། །རུ་ནི་བྱམས་སྲས་ལྔ་སྟོང་ལྔ་བརྒྱ། །ཡེ་གཤེན་གཡུང་དྲུང་སེམས་དཔའི་ཡུམ་མ། །གནམ་ས་སྲིད་པའི་བོན་གཤེན་རྔ་ཐོགས། །མུ་བཞི་སྲས་སྐྱེད་ཡུམ་ལ་ཕྱག་འཚལ། །བ་ནི་བྱམས་ཕྲན་འབུམ་ཕྲག་མཐའ་ཡས། །ལྷ་མོ་སྨན་མོ་མཁའ་འགྲོ་མ་མོ། །སྣ་ཚོགས་སྤྲུལ་སྐུ་འགྲོ་དོན་མངོན་ཞུགས། །ཚོགས་བཞི་དཔག་མེད་ཡུམ་ལ་ཕྱག་འཚལ། །ཡེ་ནི་རྒྱས་པ་རྒྱ་ཆེའི་ཡུམ་རྣམས། །ཐུགས་ཀྱི་ཡང་སྙིང་བྱམས་མར་འདུས་མ། །རྩ་བའི་སྔགས་བསྟོད་འདི་ཡིས་འགྲུབ་མ། །གསང་གསུམ་མཛོད་འཛིན་ཡུམ་ལ་ཕྱག་འཚལ། །ཏ་ནི་འཇིག་རྟེན་གསུམ་གྱི་དཔལ་མགོན། །ལྷ་ཀླུ་གནོད་སྦྱིན་ཕྱོགས་སྐྱོང་འདུལ་མ། །སྡེ་བརྒྱད་ཀུན་ལ་མངའ་མཛད་ཆེན་མོ།།འགྲོ་དྲུག་སྒྲོལ་མཛད་ཡུམ་ལ་ཕྱག་འཚལ།།འདུ་འདུ་འཁོར་འདས་གཉིས་ལ་གནས་ཀྱི། །ས་བཅུའི་སེམས་དཔའ་རྣམས་ཀྱིས་བསྟོད་མ། །སངས་རྒྱས་མ་ལུས་ཀུན་གྱི་ཡུམ་གཅིག །ས་གསུམ་འདུལ་མཛད་ཡུམ་ལ་ཕྱག་འཚལ། །སྭཱ་ཡི་ཡི་གེ་རྫོགས་པའི་བར་དེར། །ཀུན་གསལ་འབུམ་ལྔ་ཁམས་བརྒྱད་བྱམས་མ། །ཤེས་དང་ཤེས་བྱ་མ་ལུས་ཉིད་དོན། །མཐའ་གསུམ་བྲལ་གྱུར་ཡུམ་ལ་ཕྱག་འཚལ། །ཧཱ་ནི་མདོ་ཡི་སངས་རྒྱས་ཡུམ་སྟེ། །བདེ་བར་གཤེགས་པ་བླ་ན་མེད་པ། །ཡང་དག་མངོན་པར་རྫོགས་པའི་སངས་རྒྱས། །བྱམས་མ་ཆེན་མོ་ཡུམ་ལ་ཕྱག་འཚལ་ལོ། །ཨཱོཾ་མ་བ་མ་དེ་མ་ཧི་མོ་ཧ་ཨེ་མ་ཧོ་མ་ཡེ་རུ་པ་ཡེ་ཏ་འདུ་འདུ་སྭཱ་ཧཱ། སྔགས་ཀྱི་རྒྱལ་བོ་ཉི་ཤུ་རྩ་གཅིག །བོན་གྱི་རྒྱལ་བོ་བྱམས་མའི་བསྟོད་པ། །ལུང་གི་རྒྱལ་བོ་ཀུན་གསལ་ཆེན་མོ། །བཀའ་ཡི་རྒྱལ་བོ་སྟོན་པས་གསུངས་པ། །ཉེར་གཅིག་ལེའུ་འཁོར་འདས་མ་ལུས། །མཚན་བརྗོད་ཐམས་ཅད་ཚང་བ་ཉིད་དོ། །འདི་བཀླག་བོན་རྣམས་རྫོགས་པར་འགྱུར་ཏེ།།ཕན་ཡོན་བསམ་མཐའ་ཡས་པ་འཐོབ་བོ། །རྩ་བའི་སྔགས་ཀྱི་བསྟོད་པ་ཉི་ཤུ་རྩ་གཅིག །སྟོན་པས་གསུངས་པ་ལ་མངོན་པར་བསྟོད་དོ།། །།བྱམས་མའི་སྔགས་བསྟོད་འདི་ནི་རྫོགས་པའི་སངས་རྒྱས་སྟོན་པ་གཤེན་རབ་ཀྱིས་ཡེ་གཤེན་གཡུང་དྲུང་སེམས་དཔའརྣམས་ལ་གསུངས། དེ་ནས་རིག་འཛིན་སེམས་དཔའ་རྣམས་ལ་རིམ་པར་བརྒྱུད་ནས། རྒྱལ་བོ་གྲི་གུམ་གྱི་རིང་ལ་གཏེར་དུ་གཤེགས། ཕྱིས་ཕྱྭ་གསས་ཀེང་ཙེ་ལན་མེད་ཀྱིས་ལུང་བསྟན་ནས། རྗེ་བཙུན་ཁྲོ་ཚང་འབྲུག་ལྷས་ཟར་གྱི་སྟག་སྣ་ནས་སྤྱན་དྲངས་ཏེ་ཉལ་སྟོན་གཞོན་རྩེ་ལ་གནང་ནས་རིམ་པར་བརྒྱུད་པའོ། །སྐུ་ལྔ་སྐྱོབ་པ་མ་བརྒྱད་དང༌། །བཅུ་དྲུག་སོ་གཉིས་ལྔ་བཅུའི་ཚོགས། །སྐྱེ་རྒ་ན་འཆི་འདུལ་མཛད་སོགས། །བྱམས་ཆེན་རྒྱལ་བ་སྲས་བཅས་ཀྱིས། །དགྲ་དང་བྱད་དང་རིགས་དང་ཀླུ། །མུ་སྟེགས་སྐྱོན་སྒྲིབ་ཚེ་སྲོག་གཟའ། །འཇིགས་པ་བརྒྱད་ལས་སྐྱོབས་པ་དང༌། །དཔལ་དང་འབྱོར་བའི་དངོས་གྲུབ་སྩོལ། །རྫོགས་སངས་རྒྱས་པར་མཛད་དུ་གསོལ། །ཐམས་ཅད་བསྟོད་པའི་རྒྱལ་བོ་འདི་བརྗོད་པས། །ཤེས་རབ་བྱམས་མ་ཡུམ་གྱི་དབྱིངས་ཉིད་དུ། །སྤྲོས་བྲལ་བདེ་ཆེན་བོན་སྐུར་སངས་རྒྱས་ཤོག །༧རྒྱལ་ཡུམ་བྱམས་མ་ཁྱོད་སྐུ་ཅི་འདྲ་དང༌། །འཁོར་དང་སྐུ་ཚེ་ཚད་དང་ཞིང་ཁམས་སོགས། །ཁྱེད་ཀྱི་མཚན་མཆོག་བཟང་པོ་ཅི་འདྲ་བ།།དེ་འདྲ་ཁོ་ནར་བདག་སོགས་འགྱུར་བར་ཤོག །ཁྱོད་ལ་བསྟོད་ཅིང་གསོལ་བ་བཏབས་པའི་མཐུས། །བདག་སོགས་གང་དུ་གནས་པའི་ས་ཕྱོགས་སུ།།ནད་གདོན་དབུལ་ཕོངས་འཐབ་རྩོད་ཞི་བ་དང༌། །བོན་དང་བཀྲ་ཤིས་འཕེལ་བར་མཛད་དུ་གསོལ།།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།